The Wall — ინგლისური პროგრესული როკ-ჯგუფ პინკ ფლოიდის 1980-1981 წლების საკონცერტო ტურნე. ჩატარდა ამავე სახელწოდების ალბომის მხარდასაჭერად. გამართული კონცერტებისა და ქალაქების რაოდენობით იგი წინა ტურნეებთან შედარებით მცირე მასშტაბის იყო, სულ 31 კონცერტით. ტურნე აღსანიშნავი იყო თეატრალიზებული შოუს ელემენტებით, განსაკუთრებით გიგანტური კედლით, რომელიც სცენაზე შენდებოდა, რათა ალბომში მოთხრობილი გაუცხოების თემის ილუსტრირება მოეხდინა. ეს იყო ჯგუფის უკანასკნელი ტურნე, რომელიც შედგა ოთკაციანი შემადგენლობით (უოტერსი/გილმორი/რაიტი/მეისონი).

მომზადება |

ერთ-ერთი საწყისი წერტილი იყო ალბომზე The Wall ჯერალდ სკარფის მუშაობა. კონცერტებისთვის მას დაევალა ანიმაციური სეგმენტების შექმნა, რომლებიც პროექციის სახით სცენაზე გამოჩნდებოდა. სკარფი ჯგუფთან უკვე თანამშრომლობდა 1975 წელს, როდესაც მრგვალ ეკრანზე პროექციის სახით გამოჩნდა „Shine On You Crazy Diamond (Parts 1-5)“ და „Welcome To The Machine“. მხატვარი ხშირად იხსენებდა ბავშვობას და მეორე მსოფლიო ომით მოცულ ლონდონს, რომელსაც ახასიათებდა მოსახლეობაში მასობრივად დარიგებული აირწინაღები. შემდგომში ეს თემა გაცოცხლდა სიმღერის „Goodbye Blue Sky“ ანიმაციურ სეგმენტში.

კონცერტებისთვის მომზადებისას სკარფი იყენებდა ლონდონის ფულჰემ-როუდზე მდებარე სახელოსნოს. ანიმაციურ ეპიზოდებზე მუშაობდნენ მარკ სტიუარტი, ჯილ ბრუქსი და 40-მდე სხვა ანიმატორი. სკარფს ჰქონდა სახასიათო სტილი, რომელიც „Sunday Times“-ით გახდა ცნობილი, ამიტომ საჭირო გადახდა მისი ადაპტირება, რათა სხვებს მისი ასლის შექმნა შეეძლოთ.

ფილმში „პინკ ფლოიდი: კედელი“ და კონცერტების დროს ეკრანზე წარმოდგენილი კადრების ოფიციალური აღწერა ასეთია: „კედლები კივიან, ყვავილები იქცევიან სისხლიან მავთულებად. მშვიდობის მტრედი ფეთქდება, მისი შიგნეულობიდან ჩნდება საზარელი არწივი. ეს განრისხებული არსება გიგანტური კლანჭებით მიწების გიგანტურ მასებს აბრუნებს და ანადგურებს მთელ ქალაქებს. იგი ეშვება მიწაზე და შობს ომის ღვთაებას - გარგანტუას მსგავს ფიგურას, რომელიც იქცევა რკინად და იღლიებიდან ბომბდამშენებს უშვებს, რომლებიც იქცევიან საფლავების ჯვრებად. ამ დროს შეშინებული ხალხი თავშესაფარში გარბის. სამხედროთა აჩრდილები ეცემა და დგება. გვამების ამ გროვაზე გაერთიანებული სამეფოს დროშა იქცევა სისხლიან ჯვრად. სხეულებიდან სისხლი მიედინება ჯვარზე და წყლის სადენებში უაზროდ მიემართება. ტაძრები ინგრევა და კაშკაშა ღვთაებათა სახით ბრუნდება, ხოლო გიგანტური ჩაქუჩები მწყობრებად მიემართებიან და გზად ყველაფერს ანგრევენ“.

ტექნიკური დეტალები |

სკარფმა პირველ რიგში უოტერსს ურჩია, ყურადღება გადაეტანა კონცერტების დადგმაზე, რათა მოგვიანებით ისინი გამოეყენებინა ფილმზე მუშაობისას. თავდაპირველი გეგმით ჯგუფს უნდა მოეწყო მასშტაბური ტურნე, რომელშიც საკუთარი სცენით იმოგზაურებდა. ეს იქნებოდა „ლოქორა“ - 107.89 მეტრის სიგრძის და 24.99 მეტრის სიმაღლის გიგანტური გასაბერი კარავი, რომელშიც 5000 ადამიანი დაეტეოდა. მენეჯერი სტივ ო'რურკი პრესასთან საუბრისას აღნიშნავდა: „ბრიტანეთის დარბაზები არ გვაძლევს საშუალებას, დავდგათ ჯგუფის 45 ტონიანი ტექნიკა და 45 კილოვატიანი გამაძლიერებლები. ვთქვათ, გლაზგოში კონცერტის მოსაწყობად ერთადერთი საშუალება საკუთარი საკონცერტო დარბაზია. ერთი დღე მიდის მის აწყობაზე, მაგრამ საბოლოო შედეგად ღირს“.

პრობლემას წარმოადგენდა ის, რომ თავად ტექნიკის განლაგება და აწყობა კარავის გაშლასთან შედარებით უფრო ხანგრძლივი პროცესი იყო. გარდა ამისა, სქემები რატომღაც დაავიწყდათ სტუდიაში Britannia Row. ჯგუფი იძულებული გახდა, საკონცერტო მოედნების შეზღუდული რაოდენობა გამოეყენებინა. ასეთები იყო - სპორტული არენა ლოს-ანჯელესში, Nassau Coliseum ნიუ-იორკში (ორივე - 1980 წლის თებერვალში), ლონდონის ერლს-კორტი (საგამოფენო დარბაზი, 1980 წლის აგვისტო და 1981 წლის ივნისი), Westfalenhallen (დორტმუნდი, დასავლეთი გერმანია, 1981 წლის თებერვალი). ოთხივე წარმოადგენდა საკმაოდ დახურულ საკონცერტო მოედანს და არა სტადიონს, როგორც 1977 წლის ტურნეს In The Flesh ფარგლებში ხდებოდა. როჯერ უოტერსის თქმით, ეს მნიშვნელოვანი განსხვავება იყო. „იმ ტექნოლოგიით, რომელსაც ამჟამად ვფლობთ, კარგი ფულის დახარჯვისა და საჭირო ხალხის შეკრებით შეიძლება 15.000 მსმენელის შეგროვება“. შედეგად ჯგუფმა 500 000 გირვანქა სტერლინგი მხოლოდ დეკორაციებსა და ტექნიკაზე დახარჯა.

სკარფის გარდა გუნდში შედიოდნენ მარკ ფიშერი და ჯონათან პარკი, რომლებმაც წინა ტურნეზე იმუშავეს. მათი ყველაზე დიდი ქმნილება იყო გიგანტური კედელი - სიგრძეში 48.76 მეტრის, ხოლო სიმაღლეში - 10.66 მეტრის სიგრძის. კონცერტის დროს ამ კედელს აგებდა ტექნიკური პერსონალის ერთი ნაწილი. სულ იყო 340 აგური, რომელიც სიმღერის „Goodbye Cruel World“ დასრულებისთვის ასრულებდა ნახსენებ კედელს. ამ ოპერაციისთვის, გარდა სცენაზე მომუშავე დამხმარე პერსონალისა, აუცილებელი იყო ჰიდრავლიკური ამწე. ფიშერი და პარკერი ასევე მუშაობდნენ კიდევ ერთ დილემაზე - კონცერტების ბოლოს მუყაოს აგურებისგან შემდგარი კედლის დანგრევისას მუსიკოსთა და მათ ინსტრუმენტთა დაცვაზე. ამისთვის სპეციალური ბადეები შეიმუშავეს.

ჯგუფისთვის დამახასიათებელ სასცენო მოძრავ ელემენტებს (თვითმფრინავი, ღორი) დაემატა სკარფის მიერ ალბომის The Wall პერსონაჟების მიხედვით აგებული აგებული გიგანტური მარიონეტები - მასწავლებლის, დედისა და პინკის ცოლის სახით. მრგვალი ეკრანი, რომელიც ცნობილი იყო წინა ტურნეებიდან, გამოიყენებოდა პროექციისთვის, ხოლო კონცერტის მეორე ნახევარში თითქმის არ ჩანდა და სკარფის ანიმაცია პროეცირებით გადაიცემოდა კედელზე.

ყველა ამ შემადგენელი ნაწილით, სხვადასხვა წყაროს თანახმად ჯგუფმა შოუს რეპეტიცია ათჯერ გამართა - ქალაქ კალვერ-სიტის (კალიფორნია) გადასაღებ პავილიონში. რამდენიმე კვირა დასჭირდა სცენის ლოს ანჯელესის სპორტულ არენაზე დადგმას. როჯერი: „პრემიერის წინ ყველა მძიმედ შრომობდა. პირველად კედელი დაასრულეს პირველ შოუმდე ოთხი დღით ადრე. მასზე ხდებოდა პროექციების დემონსტრირება. მე კედლის ზედა ნაწილში ვიდექი, დავხედე მას უკანასკნელი რიგიდანაც და გული ამიჩქარა, თრთოლვა დამეწყო. ვიფიქრე, რა ფანტასტიური იყო, რომ ხალხს ამის მოსმენა და ხილვა ნებისმიერი ადგილიდან შეეძლო“.

პრემიერა დაგეგმილი იყო 7 თებერვალს. განათება ჯერ კიდევ არ იყო წესრიგში და ჯგუფი იძულებული გახდა, მიეწვია დამატებითი ტექნიკოსი. ეს იყო მარკ ბრიკმანი, რომელიც შემდგომში მათთან კვლავ მუშაობდა, მაგრამ ასევე ეხმარებოდა როჯერ უოტერსსა და დევიდ გილმორს (მათ სოლო კონცერტებზე). „შოუმდე 24 საათით ადრე გამომიძახეს. რაც იქ ვიხილე, ნამდვილ თეატრალიზებულ შოუს წარმოადგენდა, ყველაზე დიდს, რაც კი მინახავს. მათ მითხრეს - 'ხვალინდელ საღამომდე ეს ყველაფერი წესრიგში უნდა იყოს. ცეცხლით წამებაა!“.

კონცერტის აღწერა |

პრემიერა ლოს-ანჯელესში გაიმართა. დაწყება წარუმატებელი აღმოჩნდა - „In The Flesh?“-ის შესრულებისას პიროტექნიკით სცენა აალდა. მაყურებელმა ეს შოუს ნაწილად ჩათვალა. უოტერსმა დაუფიქრებლად სახანძრო ბრიგადა გამოიძახა.

ყოველი შოუს დასაწყისში ჟღერდა ვერა ლინის „We'll Meet Again“. შემდეგ სცენაზე გამოდიოდა კონფერანსიე, რომელიც მაყურებელს აფრთხილებდა დარბაზში ფოტო და ვიდეო კამერების გამოყენების აკრძალვის შესახებ. ძირითადი შოუ იწყებოდა „სუროგატული ჯგუფის“ (რომელიც ნახსენებია „In the Flesh?“-ში) გამოსვლით - დამხმარე ბენდით, რომელსაც პინკ ფლოიდის მუსიკოსთა ნიღბები ეკეთა.

უოტერსი: „იგულისხმებოდა, რომ ისინი აღნიშნავდნენ იმას, თუ რა ვიყავით ჩვენ. ანუ პირველ ეტაპზე ეს არის პინკი. მთელი ჯგუფი იქცა ნაცისტის ამ სახედ. თეატრალურ გარემოში ეს ხერხი გამოიყენება, რათა მაყურებელი გაოცდეს. ვინაიდან ხალხი იფიქრებს, რომ ეს ჩვენ ვართ და მოულოდნელად სულ სხვა რამ აღმოჩნდება“. ენდი ბაუნის დახმარებით უოტერსი ვოკალურ ნაწილს უფრო მეტ ყურადღებას აქცევდა. ცნობილია ისიც, რომ უილსონის დახმარებით მეისონმა შეძლო სწორი ტემპის შენარჩუნება.

კონცერტის პირველი განყოფილების კულმინაცია იყო „Goodbye Cruel World“ - უოტერსი უკანასკნელ აგურს კედელში თავად ამატებდა. ანტრაქტი ჯერ არ იყო დასრულებული, როდესაც დარბაზში ჟღერდა „Hey You“. „Nobody Home“-ის დროს კედელში ჩნდებოდა სასტუმროს ნომერი, რომელშიც როჯერი იჯდა და სხვადასხვა ტელეარხს თვალს ადევნებდა. „Comfortably Numb“-ში როჯერი ჩნდებოდა ექიმის ხალათით და კედელს ესაუბრებოდა, ხოლო კედლის თავზე ჩნდებოდა დევიდ გილმორი, რომელიც თანმხლებ სოლოს ასრულებდა.

„Run Like Hell“ ყველა კონცერტზე განსხვავდებოდა - იმის გამო, რომ როჯერი შესავალში იგონებდა სხვადასხვა რეპლიკას გაბერილი ღორის თაობაზე და მიმართავდა „დარბაზში მყოფ პარანოიკებს“. „In The Flesh“-ის შესრულების წინ კვლავ ჩნდებოდა კონფერანსიე.

კონცერტის ბოლოს, „The Trial“-ის შესრულების შემდეგ (რომელსაც ახლდა სკარფის მიერ მომზადებული ანიმაციური მონაკვეთი) კედელი ნანგრევებად იშლებოდა და ჯგუფის ოთხივე წევრი, სხვა მუსიკოსებთან ერთად, სცენაზე „Outside The Wall“-ს ასრულებდა (საგულისხმოა, რომ ზოგიერთ მათგანს ეკავა ინსტრუმენტი, რომელის მისთვის ნაკლებად დამახასიათებელი იყო).

გადაღება და აუდიოჩანაწერები |

1981 წლის ხუთი კონცერტი ალან პარკერის მიერ გადაღებული იქნა კინოფირზე - რეჟისორი მათ გამოყენებას ფილმში „პინკ ფლოიდი: კედელი“ (1982) აპირებდა. 1980 წლის 27 თებერვლის და 9 აგვისტოს კონცერტები გადაიღეს ვიდეოფირზე. ერთ-ერთ ინტერვიუში დევიდ გილმორი აცხადებდა, რომ გადაიღეს მხოლოდ 20 წუთი.

2009 წელს, ჟურნალთან „Mojo“ საუბრისას როჯერმა განაცხადა, რომ ჰქონდა მთელი შოუს ჩანაწერი და აპირებდა მის გამოცემას, თუმცა დაკავებული იყო მონტაჟით. 2010 წელს დაწყებულ ტურნეს The Wall Live ფარგლებში სიმღერის „Mother“ შესრულებისას როჯერი იყენებდა კადრებს ამ შოუდან და „Mother“-ს „საკუთარ თავთან ერთად“ ასრულებდა. ამჟამად ამ კონცერტების რომელიმე სრული ჩანაწერის გამოცემის შესახებ განცხადებები არ გაკეთებულა. ალბომის The Wall „Immersion“ გამოცემაში (2012) დამატებით DVD დისკზე წარმოდგენილია სიმღერის „The Happiest Days of Our Lives“ შესრულება (ერლს კორტი, 1981 წლის 13 ივნისი). ვარაუდობენ, რომ ეს ჩანაწერი არის საერთო არქივიდან და არა იმ მასალიდან, რომელიც როჯერის კუთვნილებაშია.

მიუხედავად იმისა, რომ ოფიციალური ვიდეო დღემდე არ გამოცემულა, არსებობს ერთადერთი ოფიციალური ცოცხალი ალბომი Is There Anybody Out There? The Wall Live 1980–81 (2000). მასში შეტანილია სხვადასხვა კონცერტიდან შეკრებილი ჩანაწერები.

წლების განმავლობაში აგრეთვე ვრცელდებოდა არაერთი აუდიო თუ ვიდეო ბუტლეგი. აუდიო ბუტლეგების სახით არსებობს პრაქტიკულად ყველა კონცერტის ჩანაწერი, ხოლო ვიდეოზე ვრცელდება ერლს კორტის და Nassau Coliseum-ის ჩანაწერები - დაბალი ხარისხით.

პერსონალი |

პინკ ფლოიდი

• 
  დევიდ გილმორი – ელექტრონული და აკუსტიკური გიტარები, ვოკალები, მანდოლინა („Outside The Wall“), მუსიკალური ხელმძღვანელი


• 
  ნიკ მეისონი – დასარტყმელი საკრავები, პერკუსია, აკუსტიკური გიტარა („Outside The Wall“)


• 
  როჯერ უოტერსი – ბას-გიტარა, ვოკალები, აკუსტიკური გიტარა („Mother“), კლარნეტი („Outside The Wall“)

ძირითადი მუსიკოსები

• რიჩარდ რაიტი – ფორტეპიანო, ორგანი, სინთეზატორი, აკორდეონი („Outside The Wall“)


• ენდი ბაუნი – ბას-გიტარა


• სნოუი უაიტი – გიტარა, 1980 წლის შოუები


• ენდი რობერტსი – გიტარა, 1981 წლის შოუები


• უილი უილსონი – დასარტყმელი საკრავები


• პიტერ ვუდი – აკუსტიკური გიტარა, კლავიშებიანი საკრავები

ვოკალისტები

• ჯო ჩიმეი – დამატებითი ვოკალი


• სტენ ფარბერი – დამატებითი ვოკალი


• ჯიმ ჰაასი – დამატებითი ვოკალი


• ჯონ ჯოისი – დამატებითი ვოკალი

საღამოს კონფერანსიეები

• გერი იუდმენი (ნიუ-იორკი, ლონდონი)


• სინთია ფოქსი (ლოს-ანჯელესი)


• ჯიმ ლედი (ლოს-ანჯელესი)


• ეის იანგი (ლოს-ანჯელესი)


• ვილი თომჩიკი (დორტმუნდი)

სეტლისტი |

1980/1981 წლების ტურნეზე სრულდებოდა მხოლოდ ალბომი The Wall, ასევე ორი სიმღერა, რომელიც არ მოხვდა მასში - What Shall We Do Now? და იმ დროისათვის უსათაურო The Last Few Bricks.

განყოფილება 1 |

1. In the Flesh?


2. The Thin Ice


3. Another Brick in the Wall (Part I)


4. The Happiest Days of Our Lives


5. Another Brick in the Wall (Part II)


6. Mother


7. Goodbye Blue Sky


8. Empty Spaces


9. What Shall We Do Now?


10. Young Lust


11. One of My Turns


12. Don't Leave Me Now


13. Another Brick in the Wall (Part III)


14. The Last Few Bricks


15. Goodbye Cruel World

განყოფილება 2 |

1. Hey You


2. Is There Anybody Out There?


3. Nobody Home


4. Vera


5. Bring the Boys Back Home


6. Comfortably Numb


7. The Show Must Go On


8. In the Flesh


9. Run Like Hell


10. Waiting for the Worms


11. Stop


12. The Trial


13. Outside the Wall

ტურნეს თარიღები |

რესურსები ინტერნეტში |

• Pinkfloydz.com

ხ • გ • რ პინკ ფლოიდი ნიკ მეისონი როჯერ უოტერსი რიჩარდ რაიტი სიდ ბარეტი დეივიდ გილმორი სტუდიური ალბომები The Piper at the Gates of Dawn A Saucerful of Secrets More Ummagumma Atom Heart Mother Meddle Obscured by Clouds The Dark Side of the Moon Wish You Were Here Animals The Wall The Final Cut A Momentary Lapse of Reason The Division Bell The Endless River საკონცერტო ალბომები Ummagumma Delicate Sound of Thunder Pulse Is There Anybody Out There? The Wall Live 1980–81 სინგლები Arnold Layne / Candy and a Currant Bun See Emily Play / The Scarecrow Flaming / The Gnome (აშშ) Apples and Oranges / Paint Box (ბრიტანეთი) It Would Be So Nice / Julia Dream Let There Be More Light / Remember a Day (აშშ) Point Me at the Sky / Careful with That Axe, Eugene (ბრიტანეთი) One of These Days / Fearless (აშშ) Free Four / Stay (აშშ) ან The Gold It's in the... (ევროპა) Money / Any Colour You Like (აშშ) Time / Us and Them (აშშ) Have a Cigar / Welcome to the Machine (აშშ) ან Shine On You Crazy Diamond Part I (ევროპა) Another Brick in the Wall (Part II) / One of My Turns Run Like Hell / Don't Leave Me Now (ევროპა/აშშ-ის ნაწილი) ან Comfortably Numb (მოგვიანებით აშშ) Comfortably Numb / Hey You (აშშ) Pink Floyd The Wall - Music From The Film (When the Tigers Broke Free / Bring the Boys Back Home) Not Now John / The Hero's Return (Parts 1 and 2) Learning to Fly / Terminal Frost და/ან One Slip On the Turning Away / Run Like Hell (საკონცერტო) (ბრიტანეთი) One Slip / Terminal Frost / The Dogs of War (ბრიტანეთი) Take It Back / Astronomy Domine (საკონცერტო) (აშშ) High Hopes / Keep Talking / Marooned Wish You Were Here (საკონცერტო) / Coming Back to Life (საკონცერტო) / Keep Talking (საკონცერტო) (ბრიტანეთი) Louder than Words კომპილაციები The Best of the Pink Floyd / Masters of Rock Relics A Nice Pair A Collection of Great Dance Songs Works 1967: The First Three Singles Echoes: The Best of Pink Floyd The Best of Pink Floyd: A Foot in the Door 1965: Their First Recordings ბოქს-სეტები Shine On Oh, by the Way Discovery The Early Years 1965–1972 ფილმები კონცერტები London '66–'67 Pink Floyd: Live at Pompeii Delicate Sound of Thunder Pulse მხატვრული პინკ ფლოიდი: კედელი The Final Cut Video EP დოკუმენტური The Pink Floyd and Syd Barrett Story The Making of The Dark Side of the Moon London '66–'67 The Story Of Wish You Were Here საუნდტრეკები San Francisco The Committee Tonite Let's All Make Love in London Zabriskie Point More Obscured by Clouds პინკ ფლოიდი: კედელი La Carrera Panamericana ტურნეები 1968 წლის ტურნე The Man and the Journey 1970 წლის ტურნე 1971 წლის ტურნე Dark Side Of The Moon 1974 წლის ტურნეები 1975 წლის ტურნე In The Flesh The Wall A Momentary Lapse of Reason The Division Bell დაკავშირებული მედია 19367 Pink Floyd The Amazing Pudding The Australian Pink Floyd Show Barn Jams Brit Floyd The Dark Side of the Moo „Embryo“ Inside Out: A Personal History of Pink Floyd The Man and The Journey Music from The Body Pinkfloydia "Proper Education" Synalpheus pinkfloydi Umma gumma Their Mortal Remains დაკავშირებული სტატიები დისკოგრაფია ვიდეოგრაფია სიმღერების სია გამოუცემელი სიმღერები დაუსრულებელი პროექტები სატელევიზიო გამოსვლები კონცერტები The 14 Hour Technicolor Dream აზიმუთ კოორდინატორი Blackhill Enterprises Britannia Row Studios Dark Side of the Rainbow EMS Synthi A Games for May Midsummer High Weekend პინკ ფლოიდის ღორები Publius Enigma Why Pink Floyd...? წიგნი კატეგორია პორტალი